டிஎன்பிஎஸ்சி | குரூப் - IV மாதிரி வினா – விடை 1

தமிழக அரசின் பல்வேறு துறைகளில் காலியாக உள்ள இளநிலை உதவியாளர், தட்டச்சர், சுருக்கெழுத்து தட்டச்சர், வரித்தண்டலர், நிலஅளவர், வரைவாளர் ஆகிய பதவிகளில் 4,963 காலிப்பணியிடங்களை நிரப்பும் வகையில் தமிழ்நாடு அரசு பணியாளர் தேர்வாணையம் (டிஎன்பிஎஸ்சி) குரூப்-4 தேர்வுக்கான அறிவிப்பை வெளியிட்டிருக்கிறது.

குரூப்-4 தேர்வு எழுதுவதற்கான அடிப்படை கல்வித்தகுதி 10-ம் வகுப்பு தேர்ச்சி ஆகும். தட்டச்சர், சுருக்கெழுத்து பணிகளுக்கு மட்டும் கூடுதலாக தொழில் நுட்பத்தேர்வுகளில் தேர்ச்சி பெற்றிருக்க வேண்டும்.

வயது வரம்பு பொதுப் பிரிவினருக்கு 18 முதல் 30 வரை. பிசி, எம்பிசி வகுப்பினருக்கு 32. எஸ்சி, எஸ்டி பிரிவினருக்கு 35. தேர்வுக்கான குறைந்தபட்ச கல்வித்தகுதியை (எஸ்எஸ்எல்சி) விட உயர் கல்வித்தகுதி (பிளஸ்2, பட்டப் படிப்பு, பட்டமேற்படிப்பு) பெற்றிருந்தால் பொதுப் பிரிவைச் சேர்ந்த ஆதரவற்ற விதவைகள் மற்றும் பிசி, எம்பிசி, எஸ்சி, எஸ்டி வகுப்பினருக்கு வயது வரம்பு இல்லை.

குரூப்-4 தேர்வுக்கான கல்வித் தகுதி எஸ்எஸ்எல்சி தேர்ச்சி என்ற போதிலும் பெரும்பாலும் பிளஸ்2 முடித்தவர்கள், பட்டதாரிகள், முதுகலை பட்டதாரிகள், எம்பில் முடித்தவர்கள், பொறியியல் பட்டதாரிகள் என அனைத்து கல்வித்தகுதி உடையவர்களும் விண்ணப்பிக்கிறார்கள்.

தற்போது அறிவிக்கப்பட்டுள்ள குரூப்-4 தேர்வுக்கு 10 லட்சம் பேர் விண்ணப்பிப்பார்கள் என்று எதிர்பார்க்கப்படுகிறது. இதன் சிறப்பு அம்சம் என்ன வெனில் இதற்கு நேர்முகத் தேர்வு கிடையாது. எழுத்துத் தேர்வில் வெற்றி பெற்றாலே அரசுப் பணி உறுதி. எனவே, போட்டி கடுமையாக இருக்கும்.

எழுத்துத் தேர்வு டிசம்பர் 21-ம் தேதி நடைபெற உள்ளது. நவம்பர் 12-ம் தேதிக்குள் ஆன்லைனில் (www.tnpsc.gov.in) விண்ணப்பிக்க வேண்டும்.

எழுத்துத்தேர்வு 300 மதிப் பெண்களை கொண்டது. அப்ஜெக்டிவ் (கொள்குறிவகை) முறையில் மொத்தம் 200 கேள்விகள் கேட்கப்படும். பொது அறிவு மற்றும் திறனறிவு (ரீசனிங்) பகுதியில் 100 வினாக்களும், பொது தமிழ் அல்லது பொது ஆங்கிலம் பகுதியில் 100 வினாக்களும் இடம்பெறும். ஒரு கேள்விக்கு 1.5 மதிப்பெண் வீதம் 200 கேள்விகளுக்கு மொத்தம் 300 மதிப்பெண். பொது அறிவு பகுதி அனைவருக்கும் பொதுவானது. அடுத்ததாக, பொது தமிழ் அல்லது பொது ஆங்கிலம்-இரண்டில் ஏதாவது ஒன்றை தேர்வுசெய்துகொள்ளலாம்.

பெரும்பாலான வி்ண்ணப்ப தாரர்கள் குறிப்பாக கிராமப் புறங்களைச் சேர்ந்த மாண வர்கள் பொது தமிழ் பாடத் தைத்தான் விருப்பமாக தேர்வு செய்கிறார்கள்.

`வெற்றிக்கொடி' பகுதி மூலம் உயர்கல்வி, வேலை வாய்ப்பு தொடர்பாக ஏராளமான தகவல்களை மாணவ, மாணவி களுக்கு வழங்கிக் கொண்டி ருக்கும்

இந்து' நாளிதழ், குரூப்-4 தேர்வுக்குப் படித்துக் கொண்டிருக்கும் மாணவ, மாணவி களுக்கு உதவும் வகையில் நல்ல தரமான மாதிரி வினா-விடைகளை வெளியிட இருக்கிறது.

டிப்ஸ்.. டிப்ஸ்..

• அரசுப் பணிக்கான போட்டித் தேர்வுகளை பல்கலைக்கழக தேர்வுகள் போல் எண்ணி படிக்கக் கூடாது. இங்கு குறைந்தபட்ச தேர்ச்சி மதிப்பெண் என்று எதுவும் கிடையாது. யார் அதிக மதிப்பெண் எடுக்கிறார்களோ, அவர்களுக்குத்தான் வேலை. எனவே, அதிக மதிப்பெண் பெற விரிவாக படிக்க வேண்டியது அவசியம்.

• கடந்த 5 ஆண்டுகளில் கேட்கப்பட்ட கேள்வித்தாள்களைப் படித்து எவ்வாறெல்லாம் கேள்விகள் கேட்கப்பட்டுள்ளன என்பதை கண்டறிந்து தற்போது நாம் எந்த பாடத்தின் பாகங்களை விரிவாகப் படிக்க வேண்டும் என்று திட்டமிட வேண்டும்.

• முன்பு தேர்வெழுதி வெற்றிபெற்றவர்களை அணுகி, எந்தெந்த புத்தகங்கள், பொது அறிவு, மாத, வார இதழ்கள், பத்திரிகைகள் உபயோகமாக இருந்தன என்பதை கேட்டு அவற்றை வாங்கிப் படிக்க வேண்டும்.

• என்னதான் முயற்சி இருந்தாலும் முயற்சியுடன் கலந்த பயிற்சி இருந்தால் வெற்றி வெகு தூரமில்லை. போட்டித்தேர்வுக்கு தயாராவோர் தங்கள் இருப்பிடத்துக்கு அருகில் உள்ள ஏதேனும் ஒரு பயிற்சி மையத்தில் சேர்ந்தால் உடனுக்குடன் ஏற்படும் சந்தேகமும், தயக்கமும் நீங்கிவிடும். மாதிரித் தேர்வுகளும், முனைப்போடு தன்னுடன் படிக்கும் பிற பயிற்சியாளர்களின் உத்வேகமும் உங்களை வந்தடைய வாய்ப்புகள் அதிகம்.

• தற்போதைய கேள்விகள், கடுமையாகவும், யோசித்து விடையளிக்கக்கூடிய வகையிலும் அமைகிறது. எனவே, இத்தகைய சூழலில், தேர்வுக்கு தயாராகிவரும் மாணவர்கள் பாடத்திட்டத்தைப் புரிந்து படித்து பல மாதிரித் தேர்வுகளை எழுத வேண்டும். ஒரு நாளுக்கு 5 மணி நேரம் படிக்க ஆரம்பித்து 8 மணி நேரம் வரை படிக்கப் பழகிக்கொள்ள வேண்டும்.

• உங்களின் மனோபாவம் (Attitude), தன்னம்பிக்கை (Self-confidence) ஆகியவற்றை வளர்த்துக்கொண்டு, அரசு பணியில் சேருவேன் என்ற உறுதியை எடுத்தால் வெற்றி உறுதி. நிமிர்ந்து பாருங்கள்.. உங்கள் எதிரிலேயே மகத்தான வெற்றி தெரிகிறது!

தேர்ந்தெடுக்கப்பட்ட வினா விடைகள் நாளை முதல் அணிவகுக்கும்.

நடக்கும் இலை… ஓடும் குச்சி… நீந்தும் கல்…!

உயிரினங்களில் பலவற்றுக்குப் ‘உருமறைப்பு’ (camouflage) என்ற தகவமைப்பை இயற்கை வழங்கியிருக்கிறது. சில உயிரினங்களுக்கு இடத்துக்கு ஏற்றாற் போல தோலின் நிறம் அமைந்திருக்கும். சில உயிரினங்களுக்கு இடத்துக்கு ஏற்றாற் போல நிறம் மாறும். சில உயிரினங்களின் உடலில் உள்ள கோடுகளும் புள்ளிகளும் எதிரிகளைக் குழப்பமடையச் செய்யும்.

அதாவது, எளிதில் எதிரியின் கண்களில் படாமல் தப்பிக்கவும், தன்னுடைய இரையை எளிதில் பிடிக்கவும் இந்தத் தகவமைப்பு உதவுகிறது. வித்தியாசமான தகவமைப்பை பெற்றுள்ள சில உயிரினங்களைப் பார்ப்போமா?

இலை வால் பல்லி

காய்ந்த இலைகளைப் போன்ற தோற்றமுடைய இலை வால் பல்லி (leaf tailed gecko) ஆப்பிரிக்காவில் உள்ள மடகாஸ்கர் தீவில் காணப்படுகிறது. மரப்பட்டை, காய்ந்த இலைகளுடன் இருக்கும் இந்தப் பல்லியை நம்மால் கண்டுபிடிக்கவே முடியாது. 10 முதல் 30 செ.மீ. நீளம் வரையே இது இருக்கும். இலை வால் பல்லியில் எட்டு வகைகள் இருக்கின்றன.

ஒவ்வொன்றும் உருவம், நிறங்களில் சிறிய மாற்றங்களுடன் காட்சியளிக்கின்றன. பகல் நேரங்களில் மரப்பட்டை, கிளைகளில் ஓய்வெடுத்துவிட்டு, இரவு நேரங்களில் உணவு தேடிக் கிளம்பும். பூச்சிகள், கொறிக்கும் சிறு விலங்குகள் இவற்றின் உணவு.

இலைப் பூச்சி

இலைப் பூச்சியை (leaf insect) ‘நடக்கும் இலை’ என்றே அழைக்கிறார்கள். பெயருக்கு ஏற்றாற் போல இலையைப் போலவே இருக்கிறது இந்தப் பூச்சி. இப்பூச்சியால் பறக்க முடியாது. பிறக்கும்போது சிவப்பு நிறத்தில் இருக்கும். இலைகளைத் தின்று வளரும்போது பச்சை நிறத்துக்கு மாறிவிடும். 2.3

அங்குலமே இருக்கும் இந்த இலைப் பூச்சிகள் இலைகளுடன் சேர்ந்திருந்தால் சுலபத்தில் கண்டுபிடிக்கவே முடியாது. இந்தியா, ஃபிஜி தீவுகளில் இலைப் பூச்சிகள் வாழ்கின்றன. இவற்றின் நெருங்கிய உறவினர்தான் குச்சிப் பூச்சிகள்.

குச்சிப் பூச்சி

நடக்கும் குச்சி அல்லது குச்சிப் பூச்சிகள் (stick insect) நீண்ட உடலைப் பெற்றவை. அசையும்போதுதான் அது குச்சிப் பூச்சி என்றே அடையாளம் கண்டுகொள்ள முடியும். இப்பூச்சிக்கு நீண்ட ஆண்டெனாக்கள் உண்டு. ஒரு அங்குலத்தில் இருந்து ஒரு அடி வரை பல சைஸ்களில் குச்சிப் பூச்சிகள் உள்ளன. பூச்சிகளிலேயே மிகவும் நீளமானது இதுதான்! பார்ப்பதற்குச் சட்டெனத் தெரியாது. துர்நாற்றத்தை வெளியிட்டு, எதிரியிடமிருந்து தன்னைப் பாதுகாத்துக்கொள்ளும். ஆசியா, ஐரோப்பா, வட அமெரிக்கக் கண்டங்களில் இது காணப்படுகிறது. பச்சை, பழுப்பு போன்ற நிறங்களில் காணப்படுகின்றன.

கும்பிடு பூச்சி

கும்பிடு பூச்சியின் (praying mantis) முன்னங்கால்கள் இரண்டும் சேர்ந்து கும்பிடுவதுபோல இருப்பதால் இந்தப் பெயர்! 180 டிகிரிக்கு இப்பூச்சித் தலையைத் திருப்பி, சுற்றுப்புறத்தைக் கவனிக்க முடியும். பச்சை, பழுப்பு வண்ணங்களில் காணப்படும் இந்தப் பூச்சியும் எளிதில் நம் கண்களுக்குத் தெரியாது. இதே நிறத்தில் உள்ள வெட்டுக்கிளி, விட்டில் பூச்சி, ஈக்கள்தான் இதன் உணவு. தென் அமெரிக்கா, ஆப்பிரிக்கா, ஆசியக் கண்டங்களில் இந்தப் பூச்சிகள் காணப்படுகின்றன.

மலர் பூச்சி

கும்பிடு பூச்சியின் உறவினர் இந்த ஆர்கிட் மலர் பூச்சி (orchid flower mantis). ஆர்கிட் மலர்களை அச்சு அசலாக ஒத்திருக்கும். வெள்ளை, இளஞ் சிவப்பு நிறத்தில் அழகாக இருக்கும். கால்கள் ஆர்கிட் மலர்களின் இதழ்களைப் போல இருக்கும். இரையைக் கண்டதும் தாவரங்கள் மீது மெதுவாக ஏறி, பூக்களுக்கு அருகே வரும். இரையாகும் உயிரினம் இது பூவா, பூச்சியா என்று குழப்பம் அடையும். அப்போது இரையைப் பிடித்துச் சாப்பிட்டுவிடும். மலேசியா, இந்தோனேசியாவில் இப்பூச்சி காணப்படுகிறது.

கல் மீன்

உலகிலேயே அதிக விஷம் கொண்டது கல் மீன் (stone fish). கடலின் தரையில் வாழக்கூடியது. பவழத்திட்டுகள், பாறைகளுக்கு அருகில் வசிக்கும். தன்னுடைய துடுப்பால் மண்ணைக் கிளறும். அசையாமல் ஒரே இடத்தில் அப்படியே இருக்கும்.

மீன் என்று தெரியாமல் இரை வந்தால், மிக வேகமாகச் சென்று முள்ளை விரித்து, விஷத்தைச் செலுத்திவிடும். பின்னர் இறந்த இரையை உணவாக்கிக்கொள்ளும். மனிதர்கள் மீது விஷம் பட்டாலும் பிழைப்பது கஷ்டம். பசிபிக், இந்தியப் பெருங்கடல்களில் இம்மீன் காணப்படுகிறது

வேட்டையாடு... விளையாடு...

சில உயிரினங்கள் இரையைப் பிடிக்க வசதியாக விசேஷ உடல் அமைப்பையும், பண்பையும் கொண்டுள்ளது. அப்படிப்பட்ட சில உயிரினங்களைப் பார்ப்போம்.

குத்தி வீழ்த்தும் உயிரி

பல வண்ணங்களில் கண்ணைக் கவரும் பீக்காக் மாண்டிஸ் ஷ்ரிம்ப் (peacock mantis shrimp) என்ற இந்த இறால், இரையை வித்தியாசமாக வீழ்த்தும். இரை அருகில் வந்ததும் கால்களால் குத்த ஆரம்பிக்கும். அதாவது நாம் ஒரு முறை கண் சிமிட்டும் நேரத்துக்குள் 50 தடவை குத்தி விடும் அளவுக்கு வேகமாகச் செயல்படும் ஆற்றல் பெற்றது. இரை சுதாரிப்பதற்குள் ஓடுகளை இழந்து, உயிரை விட்டுவிடும். கடினமான கண்ணாடியையும் இப்படிக் குத்தியே இந்த இறாலால் உடைத்துவிட முடியும்.

வாயிலிருந்து வரும் வில்லு

ஆர்ச்சர் மீனின் (archer fish) இரை எது தெரியுமா? கரைகயோரம் இருக்கும் தாவரங்களில் வசிக்கும் பூச்சிகள்தான். இவற்றை நீரில் வசிக்கும் இந்த மீனால் எப்படிப் பிடிக்க முடியும்? தண்ணீரின் மேல் மட்டத்துக்கு வந்து தாவரங்களைக் கவனிக்கும். ஏதாவது பூச்சியைக் கண்டவுடன் வாய் நிறைய நீரை உறிஞ்சும்.

பூச்சியை நோக்கி வில்லில் இருந்து அம்பு எய்வது போல, தண்ணீரைப் பீய்ச்சி அடிக்கும். பூச்சி பயந்து போய் தண்ணீரில் விழும். வேகமாக நீந்திச் சென்று பூச்சியைச் சாப்பிட்டுவிடும். 16 அடி உயரம் வரை கூட இப்படித் தண்ணீரைப் பீய்ச்சி அடிக்க இந்த மீன்களால் முடியும். ஆனால், 3 முதல் 6 அடி வரையே பெரும்பாலும் குறி வைத்து இரையைப் பிடிக்கிறது. முதல் முயற்சியில் இரை கிடைக்காவிட்டால், தொடர்ந்து முயன்று பிடித்துவிடும்.

ஷாக் கொடுக்கும் உயிரி

குறைவான பார்வைத் திறன் கொண்டது எலக்ட்ரிக் ஈல் (electric eel). தன்னுடைய உடலிலிருந்து 10 வோல்ட் மின்சாரத்தை வெளிப்படுத்தி, இரை அருகில் இருப்பதை உறுதி செய்துகொள்ளும் இது. இரை நெருங்கியவுடன் 600 வோல்ட் மின்சாரத்தைப் பாய்ச்சுகிறது. உடனே இரை இறந்துவிடும். சராசரியாக 8 அடி நீளம், 20 கிலோ எடையும் கொண்ட எலக்ட்ரிக் ஈல், மீன்களையும் தவளைகளையும் விரும்பிச் சாப்பிடும்.

டன் கணக்கு உணவு

ஹம்பேக் திமிங்கிலத்தின் (humpback whale) உணவு எது தெரியுமா? சிறிய மீன்கள், இறால் ஆகியவைதான். இது டன் கணக்கில் உணவை விழுங்கும். மீன்கள் கூட்டத்தைக் கண்டவுடன் வேகத்தைக் குறைக்கும். காற்றை ஊதி, குமிழ்களை உருவாக்கும். குமிழ் வட்டங்களுக்குள் சிக்கிய மீன் கூட்டத்தைப் பெரிய வாயைத் திறந்து அப்படியே விழுங்கிவிடும்.

வலை விரிக்கும் பூச்சி

சில உயிரினங்கள் இரையைப் பிடிக்க வசதியாக விசேஷ உடல் அமைப்பையும், பண்பையும் இயற்கை கொடுத்திருக்கிறது. அப்படிப்பட்ட சில உயிரினங்களைப் பார்ப்போமா?

மண்ணுக்குள் ஒரு சுரங்கத்தை அமைக்கும் ட்ராப் டோர் சிலந்தி (Trap-Door Spider). சுரங்கத்தின் வாயிலை வலை அல்லது நார்களைக் கொண்டு அடைத்துவிட்டு, உள்ளே காத்திருக்கும். அந்த வழியாக வரும் பூச்சிகளோ, சிறிய உயிரினங்களோ தெரியாமல் வலையைத் தொட்டால் அவ்வளவுதான். உள்ளிருக்கும் சிலந்தி வேகமாக வெளியே வந்து, இரையைப் பிடித்துவிடும். சிலந்தியின் சுரங்கம் யார் கண்களுக்கும் எளிதாகத் தெரியாது. வலை விரித்து இரையைப் பிடிக்கிறது இந்தச் சிலந்தி.

விஷத்தால் கிடைக்கும் உணவு

தென் அமெரிக்காவில் வாழும் ராட்சத பூரானின் பெயர் அமேசான் ராட்சத பூரான் (Amazonian Giant Centipede). ஒரு அடி நீளம் இருக்கும். சத்தம் இல்லாமல் குகையின் மேற்கூரைக்கு வேகமாகச் செல்லும். அங்கே தொங்கிக்கொண்டிருக்கும் வெளவாலைத் தன் கால்களால் பிடித்து, விஷத்தைச் செலுத்தும். வெளவால் இறந்தவுடன், ஒரு மணி நேரத்தில் இரையை முழுவதும் சாப்பிட்டு விடும். எலி, சிறிய பறவை, பல்லி, தவளை ஆகியவை இந்தப் பூரானின் விருப்ப உணவுகள்.

கருப்பு பணம் பதுக்கப்படும் 11 நாடுகள்

உலகில் கருப்பு பணத்தை பதுக்கிவைக்கும் சொர்க்கபுரிகளாக ஐரோப்பாவை சேர்ந்த சில நாடுகள் திகழ்கின்றன. இந்தப் பட்டியலில் மொத்தம் 11 நாடுகள் உள்ளன.

இந்நாடுகளில் உள்ள பன்னாட்டு வங்கிகளில் பல்லாயிரம் கோடி கருப்பு பணம் பதுக்கப்பட்டுள்ளது. ஆனால் அப் பணத்துக்கு ஒரு சதவீதம் மட்டுமே வட்டி வழங்கப்படுகிறது. கருப்பு பணம் அதிகம் பதுக்கப்பட்டுள்ள நாடுகளின் பட்டியலின் முதல் இடத்தில் சுவிட்சர்லாந்து உள்ளது.

இந்த நாட்டின் மொத்த பரப்பளவு 41,285 கி.மீட்டர். மக்கள் தொகை 72,88,010. இதற்கு அடுத்து 10 மிகச் சிறிய நாடுகள் உள்ளன. அவை வருமாறு:

ஜிப்ரால்ட்டர்: ஜிப்ரால்டார் நீரிணை பகுதியில் அமைந்துள்ள இந்த நாட்டின் மொத்த பரப்பளவு 6.8 கி.மீட்டர். மக்கள் தொகை 28,875.

மொனாக்கோ: பிரான்ஸ் அருகேயுள்ள மிகச் சிறிய நகர நாடான மொனாக் காவின் பரப்பளவு 2.02 கி.மீட்டர். மக்கள் தொகை 36,371.

சான் மரீனோ: ஜரோப்பாவின் பழமையான குடியரசு நாடு என்றழைக்கப்படும் சான் மரீனோவின் பரப்பளவு 61 கி.மீட்டர். மக்கள் தொகை 28,117.

லீச்டென்ஸ்டெய்ன்: நான்கு புறமும் நிலத்தால் சூழப்பட்டுள்ள லீச்டென்ஸ் டெய்ன் நாட்டின் பரப்பளவு 160 கி.மீட்டர். மக்கள் தொகை 33,987.

குயெர்ன்சி: சிறிய தீவு தொகுப்புகளை கொண்ட குயெர்ன்சியின் பரப்பளவு 78 கி.மீட்டர். மக்கள் தொகை 65,573.

மான் தீவு: பிரிட்டன் அருகேயுள்ள மான் தீவின் பரப்பளவு 572 கி.மீட்டர். மக்கள் தொகை 80,058.

அந்தோரா: பிரான்ஸ் அருகே அமைந்துள்ள அந்தோராவின் பரப்பளவு 468 கி.மீட்டர். மக்கள் தொகை 71,822.

ஜெர்ஸி: பிரான்ஸ் அருகே உள்ள ஜெர்ஸி நாட்டின் பரப்பளவு 116 கி.மீட்டர். மக்கள் தொகை 89,300.

லக்சம்பர்க்: மேற்கு ஐரோப்பாவில் உள்ள லக்சம்பர்க்கின் பரப்பளவு 2586 கி.மீட்டர். மக்கள் தொகை 4,39,539.

சைப்ரஸ்: மத்திய தரைக்கடலில் அமைந்துள்ள சைப்ரஸ் மிகச் சிறிய தீவு நாடாகும். இதன் பரப்பளவு 9251 கி.மீட்டர். மக்கள் தொகை 788457.

கணக்கில் வராத ரூ.1 லட்சம் கோடி...

வெளிநாடுகளில் குவிக்கப்பட்டுள்ள கருப்பு பணம் தொடர்பான சர்ச்சைகள் நீடித்துவரும் நிலையில், கணக்கில் காட்டப்படாத ரூ. 90 ஆயிரத்து 390 கோடியை வருமான வரித்துறையினர் கண்டுபிடித்துள்ள தகவல் வெளியாகி உள்ளது.

கருப்பு பணம் பதுக்கியது தொடர்பான வழக்கில், வெளிநாட்டு வங்கிகளில் கணக்கு வைத்திருக்கும் அனைவருடைய பெயர்களையும் உச்ச நீதிமன்றத்தில் மத்திய அரசு தாக்கல் செய்துள்ளது. இந்நிலையில், சமீபத்திய அறிக்கை ஒன்றில், 2013 - 2014-ம் நிதியாண்டில், கணக்கில் காட்டப்படாத 90 ஆயிரத்து 390 கோடி ரூபாயை வருமான வரித் துறையினர் கண்டுபிடித்துள்ளனர் என்ற தகவல் வெளியாகியுள்ளது. மேலும், பல இடங்களில் நடந்த சோதனைகளில் ரூ.10 ஆயிரத்து 791 கோடியை அதிகாரிகள் பறிமுதல் செய்துள்ளனர்.

கடந்த 2012 2013-ம் நிதியாண்டில் வருமான வரித் துறையினர் நடத்திய சோதனைகளில் கண்டுபிடித்ததைவிட 367 சதவீதம் அதிகமாக 2013 2014-ம் நிதியாண்டில் கணக்கில் காட்டப்படாத பணத்தை கண்டுபிடித்துள்ளனர்.

இதுகுறித்து, சர்வதேச நிதி ஒழுங்கமைப்பு (ஜிஎஃப்ஐ) என்ற தன்னார்வ ஆய்வு நிறுவனம், கடந்த ஆண்டு டிசம்பரில் ஓர் அறிக்கை வெளியிட்டது. அதில், சட்டவிரோதமாக நிதி புழங்கும் நாடுகள் பட்டியலில் இந்தியா 5-வது இடத்தில் உள்ளதாகத் தெரிவிக்கப்பட்டுள்ளது. சட்டவிரோதமான நிதி என்பது வருமானவரி ஏய்ப்பு தவிர குற்றச் செயல்கள், ஊழல் மற்றும் இதர சட்டவிரோதமான நடவடிக்கைகளால் கிடைக்கும் பணமாகும்.

இந்நிலையில், வருவாய்த் துறை அதிகாரிகள், அமலாக்கத் துறை (ஈ.டி), சிபிடிடி போன்ற புலனாய்வு அமைப்புகளின் கோரிக்கையை ஏற்று, நிதிப் புலனாய்வுப் பிரிவு (இந்தியா) அவ்வப்போது, சட்டவிரோதப் பணப் புழக்கத்தில் ஈடுபடுபவர்களின் தகவல்களை அளித்து வருகிறது. அந்தத் தகவல்களின் அடிப்படையில் சட்டவிரோதப் பண பரிவர்த்தனை தடுப்பு சட்டம் (பிஎம்எல்ஏ), அந்நிய செலாவணி சட்டம் (ஃபெமா) ஆகிய இரு சட்டங்கள் மூலம் வழக்குகளைப் பதிவு செய்து, பல பேரை அதிகாரிகள் கைது செய்துள்ளனர்.

பிஎம்எல்ஏ சட்டத்தின்படி, அமலாக்கத் துறை இதுவரை 1,437 வழக்குகளைப் பதிவு செய்துள்ளது. 22 பேர் கைது செய்யப்பட்டு, ரூ. 1214 கோடி மதிப்புள்ள 131 சொத்துகளை முடக்குவதற்கான உத்தரவுகள் பிறப்பிக்கப்பட்டுள்ளன. பிஎம்எல்ஏ சட்டம், 2005 ஜூலை 1 முதல் அமலில் உள்ளது.

கடந்த 2000-ம் ஆண்டு ஜூன் 1 முதல் அமலில் இருக்கும் அந்நிய செலாவணி மோசடி சட்டத்தின் கீழ் (ஃபெமா) 23 ஆயிரத்து 118 வழக்குகள் பதிவு செய்யப்பட்டுள்ளன. இந்த வழக்குகளில் ரூ. 1,678 கோடிக்கு அபராதம் விதிக்கப் பட்டுள்ளது குறிப்பிடத்தக்கது.

கருப்பு பணம் எவ்வளவு?

வெளிநாடுகளில் இந்தியர்கள் பதுக்கி வைத்துள்ள கருப்பு பணம் குறித்த அதிகாரபூர்வ கணக்கீடு எதுவும் இல்லை.

இருப்பினும், அமெரிக்காவைச் சேர்ந்த தனியார் நிறுவனம் ஒன்றின் கணக்கீட்டின்படி, இந்த தொகை 466 பில்லியன் அமெரிக்க டாலர் (28 லட்சத்து 57 ஆயிரத்து 512 கோடி ரூபாய்) முதல் 1.4 டிரில்லியன் அமெரிக்க டாலர் (85 லட்சத்து 88 ஆயிரத்து 300 கோடி ரூபாய்) வரை இருக்கலாம் என்று கணக்கிடப்பட்டுள்ளது

கருப்பு பண வேட்டையில் இதுவரை..

2009, மார்ச்: வெளிநாடுகளில் பதுக்கிவைக்கப் பட்டுள்ள ரூ. 70 ஆயிரம் கோடி கருப்பு பணத்தை மீட்க மத்திய அரசுக்கு உத்தரவிடு மாறு உச்சநீதிமன்றத்தில் மூத்த வழக்கறிஞர் ராம் ஜெத்மலானி பொது நல வழக்கு தொடர்ந்தார்.

2011, ஜூலை: கருப்பு பணத்தை மீட்க சிறப்புப் புலனாய்வுக் குழு அமைப்பது தொடர்பான உத்தரவை உச்சநீதிமன்றம் பிறப்பித்தது.

2014, மார்ச்: சிறப்புப் புலனாய்வுக் குழுவை அமைப்பது தொடர்பான உத்தரவை திரும்பப் பெற வேண்டும் என்ற மத்திய அரசின் கோரிக்கையை உச்ச நீதிமன்றம் நிராகரித்தது.

லீச்டென்ஸ்டெய்னில் உள்ள எல்ஜிடி வங்கியில் கருப்பு பணம் வைத்திருந்த இந்தியர்கள் தொடர்பாக ஜெர்மனி அரசு அளித்த ரகசிய பட்டியலை வெளியிட வேண்டும் என்று உச்ச நீதிமன்றம் உத்தரவிட்டது.

2014, ஏப்ரல்: எல்ஜிடி வங்கியில் கணக்கு வைத்திருந்த 26 பேர் பட்டியலை உச்ச நீதிமன்றத்தில் மத்திய அரசு அளித்தது. இதில், 18 பேர் மீது மட்டுமே வழக்கு தொடர முடியும் என்றும், மீதமுள்ள 8 பேர் சட்டப்படி வங்கிக் கணக்குகளை வைத்துள்ளவர்கள் என்றும் மத்திய அரசு தெரிவித்தது.

சிறப்புப் புலனாய்வுக் குழு அமைப்பது தொடர் பான உத்தரவை மறுபரிசீலனை செய்யும்படி கோரி மத்திய அரசு சீராய்வு மனு தாக்கல் செய்தது. இதைக் கண்டித்த உச்ச நீதிமன்றம், தனது உத்தரவை செயல்படுத்தாததன் மூலம் நீதிமன்ற அவமதிப்பில் மத்திய அரசு ஈடுபடுவதாக விமர்சித்தது.

2014, மே: மத்தியில் பாஜக கூட்டணி அரசு ஆட்சிக்கு வந்த 3 நாட்களில் உச்ச நீதிமன்ற உத்தரவின்படி கருப்பு பணத்தை மீட்க சிறப்புப் புலனாய்வுக் குழு அமைக்கப்பட்டது.

2014, அக்டோபர்: கருப்பு பணம் வைத்துள்ள வர்கள் தொடர்பாக தன்னிடம் உள்ள பட்டியலை வெளியிட தயார் என்று உச்ச நீதிமன்றத் தில் மத்திய அரசு தெரிவித்தது. அதே சமயம், ரகசியம் காக்கப்பட வேண்டும் என்ற ஒப்பந்தத்தின்படி பகிரங்கமாக வெளி யிட முடியாது என்று பாஜக அரசு தெரிவித்தது. முந்தைய காங்கிரஸ் அரசும் இதே நிலைப்பாட்டை எடுத்திருந்தது குறிப்பிடத்தக்கது.

கருப்பு பணம் மீட்பு தொடர்பாக 2011-ம் ஆண்டு, ஜூலையில் பிறப்பித்த உத்தரவில் மாற்றம் செய்ய வேண்டும் என்று பாஜக கூட்டணி அரசு உச்ச நீதிமன்றத்தில் முறையீடு செய்தது. ரகசியம் காக்கப்படும் என்ற உத்தர வாதத்தை தராவிட்டால், கருப்பு பணம் வைத்திருப்போரின் பட்டியலை அளிப்பது தொடர்பான ஒப்பந்தத்தை ஏற்படுத்த வெளிநாடுகள் முன்வராது என்று மத்திய அரசு கருத்துத் தெரிவித்தது.

2014, அக்டோபர் 27: கருப்பு பணம் வைத்திருப் போர் பட்டியலில் இடம்பெற்றுள்ள 3 பேரின் பெயர்களை மத்திய அரசு, உச்ச நீதிமன்றத்தில் தெரிவித்தது.

2014, அக்டோபர் 28: முழுமையான பெயர் பட்டியலை சீலிடப்பட்டுள்ள கவரில் வைத்து அளிக்க வேண்டும் என்று மத்திய அரசுக்கு உச்ச நீதிமன்றம் உத்தரவிட்டது.

2014, அக்டோபர் 29: கருப்பு பணம் வைத்திருப் பது தொடர்பாக 627 பேர்

கருப்பு பணம் என்றால் என்ன?

வருவாயில் இருந்து அரசுக்குக் கணக்குக் காட்டாமல் மறைக்கப்படும் பணம் எல்லாமே கருப்பு பணம்தான். பொதுவாக வரி கட்டுவதைத் தவிர்க்கவே, வருவாய் மறைக்கப்படுகிறது. சில வேளைகளில் குற்ற வழிகளில் வந்த பணத்தையும் கணக்குக் காட்ட முடியாமல் போவதால் அதுவும் கருப்பு பணமாகி விடுகிறது.

நாட்டின் மொத்த உள்நாட்டு உற்பத்தியில் மூன்றில் இரண்டு பங்கு, பணப் பரிவர்த்தனை மூலமே நடைபெறுகிறது. ஆண்டுக்கு சுமார் 62 லட்சம் கோடி என்று கணக்கிடப்பட்டுள்ளது. உதாரணத்துக்கு மளிகைப் பொருட்கள் வாங்கு கிறோம். அதற்குப் பதிலாகப் பணம் கொடுக் கிறோம். அதற்குப் பெரும்பாலும் ரசீது இல்லை. அந்தப் பணம் கருப்பு பணமாக மாறுகிறது. இதுதவிர ரியல் எஸ்டேட், உற்பத்தி பொருட்கள், தங்கம் மற்றும் வீட்டு உபயோகப் பொருட்கள் வாங்கு வதில் ஏராளமான கருப்பு பணம் புழங்குவதாகக் கூறப்படுகிறது. கருப்பு பணம் எப்படி கை மாறுகிறது என்பதைப் பார்ப்போம்.

ரசீது இல்லாமல் புழங்கும் கருப்பு பணம்

ஒரு நிறுவனம் ஒரு லட்சம் ரூபாய்க்கான பொருட்களை இன்னொரு நிறுவனத்துக்குச் சப்ளை செய்கிறது. ஆனால், அதற்குரிய ரசீதை வழங்க வில்லை. அதன்பிறகு சப்ளை செய்த பொருட்களின் மதிப்பில் ரூ.60 ஆயிரத்துக்கு மட்டும் ரசீது வழங்குகிறது.

பொருட்களை வாங்கிய நிறுவனம், ரூ.40 ஆயிரத்துக்கான காசோலையை வழங்குகிறது. ரூ.20 ஆயிரத்தை வரியாகக் கழித்து விடுகிறது.

ஒரு மாதம் கழித்து, மீதித் தொகை ரூ.40 ஆயிரம், பொருட்கள் சப்ளை செய்த நிறுவனத்துக்கு பணமாகக் கொடுக்கப்படுகிறது. இந்தப் பணம் கணக்கிலேயே வராது. இதுதான் கருப்பு பணம்.

தனியார் நிறுவனங்களில் முதலீடு

ஒரு நிறுவனத்துக்கு ஒருவர் ரூ.10 கோடி கடனை பணமாகக் கொடுக்கிறார். அதைப் பெற்றுக் கொண்ட நிறுவனம், தனது விற்பனையாளர்களுக்கு பணமாக முதலீடு செய்கிறது. கடைசியில் அந்த நிறுவனம் நுகர்வோர்களிடம் இருந்து காசோலையாகப் பணத்தைத் திரும்பப் பெறுகிறது. அதன்பின், 10 கோடி ரூபாய் கடனாக வழங்கியவர், பணத்துக்குப் பதில் நிறுவனத்திடமிருந்து பங்குகளாக வாங்கிக் கொள்கிறார்.

ரியல் எஸ்டேட்

ஒருவர் தன்னுடைய நிலத்தை ரூ.20 கோடிக்கு இன்னொருவருக்கு விற்கிறார். அதில் 50 சதவீதத் தொகையை (ரூ.10 கோடியை மட்டும்) பணமாகப் பெற்றுக் கொள்கிறார். மீதி 50 சதவீதத் தொகையை காசோலையாகப் பெறுகிறார். ரூ.10 கோடிக்கான காசோலையை வங்கியில் செலுத்தி, ஒரு பெருந் தொகையை பணமாக எடுத்துக் கொள்கிறார். மீதியை தங்கம் வர்த்தகம் செய்வதற்காக வங்கியில் இருந்து டிமாண்ட் டிராப்டாக பெற்றுக் கொள்கிறார்.

இந்த விஷயத்தில் முதலில் பணமாகப் பெற்ற ரூ.10 கோடி அரசுக்கு கணக்குக் காட்டப்படாமல் போகும். அது கருப்பு பணமாக மாறி விடும். இப்படி பல வழிகளில் அரசுக்குக் கணக்குக் காட்டாமல், வரியைத் தவிர்க்க சேர்க்கப்படும் பணம்தான் கருப்பு பணம்.

அழிந்துவரும் பட்டாம்பூச்சி மீன்கள்: பவளப் பாறைகள் அழிவைத் தடுத்தால் பாதுகாக்கலாம்

பவளப் பாறைகளின் அழிவு மற்றும் வேட்டை ஆகியவற்றால் பட்டாம்பூச்சி மீன்கள் அழிந்து, அரிதாகி வருவதாக கடலியல் ஆர்வலர்கள் வேதனை தெரிவித்தனர்.

மன்னார் வளைகுடா கடற்பரப்பில் 21 தீவுகளும், அதைச் சுற்றி கடல் உயிரினப் பெருக்கத்துக்கு ஆதாரமான பவளப் பாறைகளும், கடற்புற்களும் அதிகளவில் காணப்

படுவதால், அரிதான கடல்வாழ் உயிரினங்கள் ஏராளமாக காணப்படுகின்றன. அவற்றில், பட்டாம்பூச்சி மீனும் ஒன்று.

112 வகை பட்டாம்பூச்சி மீன்கள்…

தங்க நிற பட்டாம்பூச்சி மீன், நான்கு கண் பட்டாம்பூச்சி மீன், நீண்ட மூக்கு பட்டாம்பூச்சி மீன் என்று பசிபிக், அட்லாண்டிக் மற்றும் இந்தியப் பெருங்கடல்களில் 112 வகையான பட்டாம்பூச்சி மீன் இனங்கள் உள்ளன. இதில் 10-க்கும் மேற்பட்ட பட்டாம்பூச்சி மீன்கள் மன்னார் வளைகுடா கடற்பகுதியில் கண்டறியப்பட்டுள்ளன.

வண்ணத்துப்பூச்சிகளைப்போல பல வண்ணங்களும், அழகிய துடுப்பு அசைவும் இருப்பதால், இந்த மீன்களை பட்டாம்பூச்சி மீன்கள் என்று மீனவர்கள் அழைக்கின்றனர். ‘Chaetodontidae’ என்பது இதன் அறிவியல் பெயர்.

முட்டையிட்டு குஞ்சு பொரிக்கும் தன்மையுடைய பட்டாம்பூச்சி மீன்கள், 12 செ.மீ. முதல் அதிகபட்சமாக 30 செ.மீ. வரையிலும் வளரக் கூடியவை. இதன் ஆயுட்காலம் 5 ஆண்டுகள். இந்த மீன்கள் ஒரே நேரத்தில் 5000 முட்டைகள் வரை ஈனும்.

உத்தம இணை…

ஒரு பட்டாம்பூச்சி ஆண் மீன், ஒரேயொரு பெண் மீனுடன்தான் ஆயுள் முழுவதும் இணையாக வாழும். பட்டாம்பூச்சி மீன்கள் பெரும்பாலும் மஞ்சள், நீலம், சிவப்பு, ஆரஞ்சு நிறங்களில் காணப்படும். இந்த மீன்கள் உடலில் உள்ள புள்ளிகளையும், கோடுகளையும் அசைத்து நடனமாடி எதிரிகளுக்கு அச்சம் ஏற்படுத்தும். பவளப் பாறைகளில் உள்ள முதுகெலும்பில்லாத பூச்சிகள் மற்றும் புழுக்களை இவை உணவாக உட்கொள்கின்றன.

மில்லியன் கணக்கில் விற்பனை…

பட்டாம்பூச்சி மீன்கள் மிகச் சிறந்த அலங்கார மீன்களாக உலகெங்கிலும் வளர்க்கப்படுகின்றன. அலங்கார மீன் வணிகத்தில் ஆண்டுக்கு 10 மில்லியன் பட்டாம்பூச்சி மீன்கள் விற்கப்படுவதாக புள்ளிவிவரங்கள் தெரிவிக்கின்றன.

பவளப் பாறைகளின் அழிவு மற்றும் வண்ண மீன் சேகரிப்புக்காக பட்டாம்பூச்சி மீன்கள் வேட்டையாடப்படுவதால், இந்த இனம் அழிந்து கொண்டே போகிறது. இதனால் 20 ஆண்டுகளுக்குப் பிறகு பட்டாம்பூச்சி மீன்களைப் பார்ப்பதே அரிதாகிவிடும் என்று கடலியல் ஆர்வலர்கள் வேதனை தெரிவிக்கின்றனர்.

பட்டாம்பூச்சி மீன்களின் வாழ்

விடங்களான பவளப் பாறைகளைப் பாதுகாப்பதன் மூலமும், பட்டாம்பூச்சி மீன்கள் வேட்டைக்கு முழுமையாகத் தடை விதிப்பதன் மூலமும் இந்த அரிய வகை மீன் இனத்தை அழியாமல் தடுக்கலாம்.

இதுகுறித்து கடலியல் ஆய்வாளர் தாகிர் சைபுதீன் கூறியது:

உலக அளவில் 14 தேசிய கடல் வாழ் உயிர்க்கோள காப்பகங்கள் உள்ளன. இதில், மன்னார் வளைகுடா உயிர்க்கோள காப்பகம் தென்கிழக்கு ஆசிய கண்டத்திலேயே அறிவிக்கப்பட்ட முதல் கடல்சார் உயிர்க்கோள காப்பகம் ஆகும். மன்னார் வளைகுடா உயிர்க்கோள காப்பக பகுதிகளில் பவளப் பாறைகள் அதிகளவில் காணப்படுகின்றன.

லட்சக்கணக்கான சிறிய உயிரினங்களால் ஆயிரக்கணக்கான ஆண்டுகளாக உருவானவை பவளப் பாறைகள். கூட்டம் கூட்டமாக வளரும் பவளப் பாறைகளுக்கு மத்தியில் கோடிக்கணக்கான நுண்ணுயிர்கள் வாழ்வதால், பட்டாம்பூச்சி மீன்கள் அவற்றை உணவாகக் கொண்டு பவளப் பாறைகளை சுற்றிக் கூட்டமாக வாழும்.

தமிழக விசைப்படகு மீனவர்கள் வாருதல் (trawling) என்ற மீன்பிடி முறையை கடந்த 40 ஆண்டுகளாக கடைப்பிடிக்கின்றனர். இந்த மீன்பிடி முறையால் மன்னார் வளைகுடா கடலுக்கடியில் உள்ள பவளப் பாறைகள் சிதைக்கப்பட்டு, கடலின் சூழல் மண்டலம் பாதிக்கப்படுகிறது. மேலும், அழகு மீன்களாக வளர்ப்பதற்காக வேட்டையாடுவதாலும் தற்போது பட்டாம்பூச்சி மீன்கள் அரிதாகி வருகின்றன. பட்டாம்பூச்சி மீன்களைக் காக்க அரசு விரைவாக நடவடிக்கை எடுக்க வேண்டும் என்றார்.

ஐஸக் மெரிட் சிங்கர் 10

நியுயார்க் நகரின் பிட்ஸ்டவுனில் பிறந்தவர். 12 வயதில் வீட்டை விட்டு வெளியேறிய இவர், எங்கெங்கோ சுற்றி, கிடைத்த வேலைகளைச் செய்து ஒரு மெக்கானிக்காகத் தன்னை நிலைநிறுத்திக் கொண்டார்.

* மெக்கானிக்காக இருந்த அவர் ஓயாமல் ஏதாவது புதிய பொருளைக் கண்டுபிடிக்கும் முயற்சியில் ஈடுபட்டு வந்தார். 1839-ல் இல்லினோயிசில் இருந்தபோது, பாறை துளையிடும் இயந்திரத்தைக் கண்டறிந்தார். அதன் காப்புரிமையை விற்றார். நடிகனாக வேண்டும் என்ற ஆசையால், அந்தப் பணத்தில் ‘மெரிட் ப்ளேயர்ஸ்’ என்னும் நாடகக் குழுவை உருவாக்கி, நாடு முழுவதும் சுற்றுப் பயணம் மேற்கொண்டு, ஐஸக் மெரிட் என்ற பெயரில் மேடைகளில் தோன்றினார்.

* ஒன்பது வருடங்கள் தொடர்ந்த இந்த நாடகக் குழுவின் தொடர் தோல்விகளால் குழு கலைக்கப்பட்டது. நடிப்புத் தொழில் கை கொடுக்கவில்லை என்பதால் சிங்கர் துவண்டுவிடவில்லை. மீண்டும் மெக்கானிக்காகவும், கண்டுபிடிப்பாளராகவும் மறுஅவதாரம் எடுத்தார்.

* 1949-ல் மரம் மற்றும் உலோகம் செதுக்கும் கருவியை உருவாக்கி அதற்கு காப்புரிமை பெற்றார். சொந்தமாக ஒரு தொழிற்சாலையை உருவாக்கி உற்பத்தியைத் தொடங்கினார். துரதிர்ஷ்டவசமாக, அங்கு ஏற்பட்ட ஒரு வெடி விபத்தில் தொழிற்சாலை தரைமட்டமானது.

* 1950-ல் ஒரு தையல் இயந்திரக் கடையில் பழுது பார்க்கும் மெக்கானிக்காக வேலை பார்த்தார். முதலாளி அவரிடம் தையல் இயந்திரம் ஒன்றைப் பழுது பார்க்கும்படி கூறினார். சிங்கரின் கண்டுபிடிப்பாளர் மூளை உடனே செயல்பட்டது. ஒரு சில நாட்களிலேயே உயர்தரம் வாய்ந்த புதுமையான முறையில் அதை மேம்படுத்தினார். மிகவும் சவுகரியமாகவும், ஒரு நிமிடத்திற்கு 900 தையல் போடக்கூடிய அதி வேகத் திறன் வாய்ந்ததாகவும் அது செயல்பட்டது.

* அதற்கு சிங்கர் தையல் மிஷின் என்று பெயரிட்டார். இதற்கான காப்புரிமைக்காக இவர் விண்ணப்பித்தபோது, இதன் அடிப்படை எலியாஸ் ஹவ் என்பவருடைய கண்டுபிடிப்பு என்பதால், அவர் சிங்கர் மீது வழக்கு தொடர்ந்தார். வழக்கில் எலியாஸ் வென்றார். இந்தத் தோல்வியும் இவரை ஒன்றும் செய்துவிடவில்லை. அதிர்ஷ்டவசமாக, அவர் தான் தயாரித்த இயந்திரங்களைத் உற்பத்திசெய்யக் கூடாது என்று தீர்ப்பில் தடை விதிக்கப்படவில்லை. 1857-ல், எட்வர்ட் கிளார்க் என்பவருடன் கூட்டாகச் சேர்ந்து ஐ.எம். சிங்கர் & கம்பெனியைத் தொடங்கினார்.

* இந்த நிறுவனம் புதுமையான உத்திகளைப் பயன்படுத்தி, உற்பத்திச் செலவைக் குறைத்து, வேலைக்குச் செல்லாத நடுத்தர வர்க்கக் குடும்பப் பெண்களும் வாங்கிப் பயன்படுத்தும் வகையில் குறைந்த விலையில் தையல் இயந்திரத்தைத் தயாரித்து விற்பனை செய்தது.1860-ல் உலகிலேயே மிகப் பெரிய அளவில் தையல் இயந்திரம் உற்பத்தி செய்யும் நிறுவனமாக இது உயர்ந்தது. மேலும் 22 புதிய தயாரிப்புகளுக்கான காப்புரிமைகளை இந்த நிறுவனம் பெற்றது.

* முதன்முதலாக வீட்டு உபயோகத் தையல் இயந்திரத்தை மிகப்பெரிய அளவில் உற்பத்தி செய்த நிறுவனத்தைத் தொடங்கியவர் சிங்கர். இவரது கண்டுபிடிப்புகளால் அமெரிக்கா அதுவரை கண்டிராத மிகப் பெரிய தொழிற்துறை வளர்ச்சியைக் கண்டது.

* இவர் பல திருமணங்கள் செய்துகொண்டவர். திருமணங்கள் மூலமாகவும் திருமணம் இல்லாமலும் ஒரு டஜனுக்கும் மேற்பட்ட வாரிசுகள் உண்டு.

* சிங்கர் ஆறடி ஐந்தங்குலம் கொண்ட ‘உயர்ந்த’ மனிதர். பூஜ்ஜியத்திலிருந்து வாழ்க்கையைத் தொடங்கிய இவர், தன் உழைப்பாலும் புதுமைக் கண்ணோட்டத்தாலும் மேதைமையாலும் மிக உயர்ந்த இடத்தை எட்டினார். தனது 63-வது வயதில் மரணமடைந்தார் இந்தச் சாதனையாளர்.

இன்று அன்று| 1914 அக்டோபர் 29: ஹிட்லர் உயிர் தப்பினார்!

சரியாக 100 ஆண்டுகளுக்கு முன்னர் நடந்த சம்பவம் இது. இந்தச் சம்பவத்தின் முடிவு மட்டும் மாறுபட்டிருந்தால், உலகத்தின் தலைவிதியே வேறாக அமைந்திருக்கலாம்.

முதல் உலகப் போர் ஐரோப் பாவை அதிர வைத்துக்கொண்டிருந்த சமயம். அப்போது பிரிட்டிஷ் படையினரை எதிர்த்துப் போரிட்டுக்கொண்டிருந்த பவேரி யாவின் ராணுவத்தில் இருந்த வீரர்களில் ஒருவர் அவர். அவரும் 3,000 வீரர்களும் தெற்கு பெல்ஜியத்தின் ஏப்ரஸ் பகுதியில் முன்னேறிக்கொண்டிருந்தார்கள். போர்களில் சீருடைக் குழப்பம் நிகழ்வதுண்டு. அன்றும் அப்படித்தான் நடந்தது. பவேரிய வீரர்களின் சீருடையைப் பார்த்த ஜெர்மனிப் படையினர், அவர்கள் பிரிட்டிஷ் வீரர்கள் என்று தவறாக நினைத்துத் தாக்கத் தொடங்கினார்கள்.

பவேரியர்களில் இருவர்தான் கடைசி யில் மிஞ்சினார்கள். சற்று நேரத்தில், இருவரில் ஒருவரும் நட்புப் படையினரின் குண்டுகளுக்குப் பலியானார். இன்னொரு வர் அணிந்திருந்த கோட்டைக் கிழித்துக் கொண்டு சீறிப்பாய்ந்தது ஒரு குண்டு. அதிர்ஷ்டவசமாக அவர் உடலில் அந்தக் குண்டுபடவில்லை. தப்பித்து நின்ற அந்த அதிர்ஷ்டசாலி வீரர்தான், சில ஆண்டுகளுக்குப் பின்னர் உலகையே உலுக்கிய ஹிட்லர். இந்தச் சம்பவம் நடந்து மூன்று வாரங்களுக்குப் பிறகு, பவேரிய வீரர்களுக்கு ‘அயர்ன் க்ராஸஸ்’ விருது வழங்கும் நிகழ்ச்சி ஒரு கூடாரத்துக்குள் நடந்துகொண்டிருந்தது. கூடாரத்துக்குள் கூட்டம் அதிகமாக இருந்ததால் ஹிட்லரும் மூன்று வீரர்களும் வெளியே வந்தனர்.

அவர்கள் வெளியே வந்த ஐந்து நிமிடங்களுக்குள் அந்தக் கூடாரத்தை, எங்கிருந்தோ சீறிவந்த ஒரு வெடிகுண்டு தாக்கியது. அந்தச் சம்பவத்திலும் அதிர்ஷ்டம் ஹிட்லர் பக்கம் இருந்தது.

லா.ச.ரா என்னும் மந்திரவாதி

தமிழ் இலக்கியத்தில் முன்னும் பின்னும் உதாரணமற்ற அபூர்வ ராகம் லா.ச.ரா.

லா.ச.ராமாமிர்தம்: பிறந்த நாள்-அக். 29, 1916 நினைவு நாள் - அக். 29, 2007

யார் இந்த லா.ச.ராமாமிர்தம்? நவீன தமிழ் எழுத்தின் தீவிரமான பகுதி பெரும்பாலும் வெகுமக்களின் ரசனை எல்லைக்கு வெளியில்தான் இருந்துவருகிறது. இதில் பல அம்சங்கள் புரிவதில்லை என்பது பெருவாரியான மக்களின் புகார். அத்தகைய புரியாத எழுத்தின் முதன்மையான உதாரணங்களில் ஒருவராக லால்குடி சப்தரிஷி ராமாமிர்தம் அடையாளம் காணப்படுகிறார்.

சொற்கள் புரியவில்லை என்றால் அகராதியைப் பார்த்துத் தெரிந்துகொண்டுவிடலாம். வாக்கியங்களே புரியவில்லை என்றால்? ‘கண்ணின் இமையுள், விழிப்பின் முதல் உணர்வாய்க் கவிந்த இருள் முழுவே உனக்கு அஞ்சலி’ என்று ஒரு கதை (த்வனி) தொடங்கினால் எப்படி இருக்கும்? ‘கண்ணாடியில் பிம்பம் விழும் த்வனிகூட எனக்குக் கேட்கிறது’ என்று சொன்னால் அதை எப்படிப் புரிந்துகொள்வது? ஆனால், இதுபோன்ற வாக்கியங்களில் இருக்கும் வசீகரமே லா.ச.ரா-வைப் புரியாமலும் பலரைப் படிக்க வைக்கக்கூடியதாகவும் இருக்கிறது. அச்சத்தை மீறிப் பாம்பின் அழகு நம்மைக் கவர்வதுபோல.

மயக்கும் மாயம்

இரண்டாயிரம் பக்கங்களுக்கு மேல் விரியும் லா.ச.ரா-வின் எழுத்தில் சரி பாதிக்கு மேல் அடிப் படைத் தமிழ் அறிவுகொண்ட எவரும் படித்துப் புரிந்து கொள்ளக்கூடியதுதான். மீதிப் பகுதியில் பெரும் பாலானவை புரியாத நிலையிலும் வசீகரிக்கக் கூடியவை; ரசித்துப் படிக்கக்கூடியவை. ‘இது இருளின் நரம்பு, எண்ணத்தின் மணிக்கயிறு, வானத்தின் நீளத்தினின்று உரித்த பொற்சரடு’ என்பன போன்ற மயக்கும் படிமங்கள் புரியாதவை என்று சொல்வதை விடவும் ஒவ்வொருவருக்கு ஒவ்வொரு பொருள் தரக்கூடியவை என்று சொல்வதே பொருத்தம்.

புரியாத நிலையிலும் மந்திரம்போல மனதில் ஒட்டிக் கொள்ளும் மாயமே லா.ச.ரா-வின் சிறப்பு. புரிவதும் புரியாததும் தற்காலிக நிலைகள். ஒரு விஷயத்தை இன்று புரிந்துகொள்ளும் விதம் நாளை மாறலாம். ஆனால், லா.ச.ரா-வின் மந்திரச் சொற்கள் தரும் மயக்கம் நீடித்து நிற்கும்.

மலை உச்சியில் பிறக்கும் நதி பல வடிவங்களையும் பெயர்களையும் எடுத்தபடி கடலை நோக்கிப் பாயும். அதன் மொத்த விகாசத்தையும் குறிப்பிட்ட வகைக்குள் அடக்க முடியாது. லா.ச.ரா-வின் எழுத்தும் அத்தகையதுதான். நனவோடை உத்தி என்று சிலர் சொல்வார்கள். ஆனால், புற உலகில் வேர் கொண்டு சம்பவங்களால் நகர்ந்து செல்லும் வலுவான யதார்த்தக் கதைகளையும் அவர் எழுதியுள்ளார். புலனுணர்வுக்கு அப்பாற்பட்ட அனுபவங்களைக் கதையாக்குபவர் என்று சொல்லலாம் என்று பார்த்தால், வலுவான தர்க்கம் பல படைப்புகளில் அடிச்சரடாக ஓடிக்கொண்டிருப்பதையும் உணர முடிகிறது. கூட்டுக் குடும்பத்தின் ஆராதகர் என்று சொல்லச் சிலர் முனைந்தால், குடும்பத்திலிருந்து முரண்படும் தனிநபர் உணர்வை முன்னிறுத்தும் கதைகள் நம்மைப் பார்த்துச் சிரிக்கும். சவுந்தர்ய உபாசகர் என்று சொல்லலாம். ஆனால், வேதனைகளின் கதையையும் இவர் எழுதிவைத்திருக்கிறார். அன்பின் உன்னதமும் பேசுவார். சுயநலத்தின் தவிர்க்கவியலாத தன்மையையும் காட்டுவார். பெண்களை சக்தியின் வடிவமாகப் பார்ப்பவர், அவர்களது சுயநலத்தையும் வன்மத்தையும் கண்டு பாராமுகமாக இருப்பதில்லை.

அழகின் கோலங்கள்

லா.ச.ரா-வுக்குக் கதை என்பது அவரது தேடலின் கருவிதான். தேடல் என்பது அன்றாட வாழ்வில் மறைந்திருக்கும் தெய்விகத் தருணங்களின் மகிமையைக் கண்டுணர்தல். கதையம்சம் என்பதைவிடவும் கதையின் வாழ்வம்சத்துக்கும் அதனுள் ஒளிரும் சத்தியத்தின் தரிசனத்துக்கும் அதிக முக்கியத்துவம் கொடுப்பவர் லா.ச.ரா. மனித உணர்வுகள் அவருக்கு மிகமிக முக்கியம். மதிப்பீடுகளின் தராசில் வைத்து உணர்வுகளை அளப்பவர் அல்ல அவர். லா.ச.ரா-வின் பாத்திரங்கள், கருவறை, சுடுகாடு, பூஜையறை, படுக்கையறை, தோட்டம், சந்தை என எல்லா இடங்களிலும் உண்மையின் தரிசனத்தைக் கண்டு நெக்குருகுகிறார்கள். புலன்களைத் தாண்டிய அனுபவங் களையும் அந்த அனுபவங்கள் வெளிப்படும் தருணங் களையும் கண்டு நமக்கும் காட்டுகிறார் லா.ச.ரா.

பச்சைக்கனவு, கஸ்தூரி, சுமங்கல்யன், பாற்கடல் போன்ற கச்சிதமான யதார்த்தக் கதைகளைப் படைக்கும் திறன் கொண்ட இவர், படைப்பின் கட்டற்ற போக்குக்கு வழி விட்டுக் கதையின் கட்டமைப்பைத் தியாகம் செய்யவும் தயங்குவதில்லை. ஒவ்வொரு படைப்பும் எதைக் கோருகிறதோ அதைத் தருவதே ஒரு படைப்பாளியின் வேலை என்று நம்புபவர் லா.ச.ரா. அதனால்தான் அவரது பல கதைகளின் குவிமையம் சிதறுகிறது. சிறுகதைகளின் ஆதார பலமான குவிமையம் சிதறும்போது அதைப் பின் தொடர்ந்து செல்வது வாசகருக்குச் சிரமமாக இருக்கும். ஆனால், கிளை பிரியும் பாதைகளில் வெளிப்படும் தரிசனங்கள் படைப்பின் ஒவ்வொரு வரியையும் மதிப்பு வாய்ந்ததாக ஆக்குவதையும் உணரலாம். ஒளிக் குவியத்தின் அழகைப் பல படைப்புகளில் தரும் இவர், ஒளிச் சிதறலின் எண்ணற்ற அழகுக் கோலங்களையும் காட்சிப்படுத்துகிறார். இத்தகைய எழுத்தைப் படிக்கும்போது கதையம்சத்தின் எல்லை களைத் தாண்டி வாசக மனம் பயணிக்கிறது. அந்தப் பயணம் படைப்பாளியின் பயணத்துக்கு இணை யான பயணமாகி, படைப்பின் தரிசனத்தை விரிவு படுத்துகிறது.

‘உன் எழுத்துத் திறமையின் முழு சக்திப் பிரயோகத்துடன் ஒரு காகிதத்தில் நெருப்பு என்று எழுதினால், அங்கு பொசுங்குகிற நெடி வர வேண்டும்’ என்று ஒருமுறை எழுதிய லா.ச.ரா. ஒவ்வொரு சொல்லுக்கும் முக்கியத்துவம் அளிப்பதை உணர முடியும். ‘வாசனாதி திரவியங்களின் மணத்தைத் தமிழாக்கிக் கொண்டுவந்தவர் லா.ச.ரா.’ என்று சுந்தர ராமசாமி எழுதியிருப்பது இவரது சொல்லழகு தரும் மயக்கத்தைக் கச்சிதமாக உணர்த்துகிறது.

லா.ச.ரா-வின் அபூர்வ ராகம்

சொல்லழகும் மெய்ப்பொருள் தேடலும் தரும் தரிசனங்களின் படைப்பனுபவம் என்று லா.ச.ரா-வின் கதைகளை ஒருவாறாக வரையறுக்கலாம். பாற்கடல், கஸ்தூரி போன்ற யதார்த்த வாழ்க்கைச் சித்திரங்கள்; புரிந்துகொள்ள முடியாத ஆளுமை விசேஷங்களை மையப்படுத்தும் அபூர்வ ராகம், தாட்சாயணி போன்ற சொல்லோவியங்கள்; யோகம், புற்று போன்ற கால, இட எல்லைகளை மீறி வெளிப்படும் தரிசனங்கள் எனப் பல தளங்களில் இயங்குபவை லா.ச.ரா-வின் கதைகள். உறவுகளின் மேன்மையையும், அவற்றின் சிக்கல்களையும், இணைந்து வாழும் விழைவையும், பிரிந்து செல்லும் வேட்கையையும், தனிமையின் சுமையையும் அதன் மகத்துவத்தையும் பேசுபவை இவரது கதைகள்.

கதைகளைச் சொல்வதைவிடவும், கதைகளை முன்வைத்து வாழ்க்கையின் மாயத் தருணங்களைக் கண்டுணர்ந்து வியப்பதும் வியக்கவைப்பதும்தான் ராமாமிர்தத்தின் எழுத்து. அந்தத் தருணங்களில் தோய்ந்து மாறுபட்ட அனுபவத்தைப் பெறுவதற்கான வாய்ப்பை ஏற்படுத்துவது ராமாமிர்தத்தின் எழுத்து. படைப்புகளில் அனுபவிக்கக் கிடைக்கும் மாயத் தருணங்களுக்காகவும் அவை முன்வைக்கப்படும் கவித்துவச் சொல்லழகின் வசீகரத்துக்காகவுமே இவரது கதைகள் என்றென்றும் படிக்கப்படும். சம கால யதார்த்த வாழ்வில் வேரூன்றிய கதைகள் பல சமயம் கால வெள்ளத்தில் நிற்காமல் போய்விடலாம். ஆனால், காலம், இடம் ஆகியவற்றைத் தாண்டிய தருணங் களைப் படைப்பாக்கும் எழுத்து காலம் தாண்டியும் வாழும். லா.ச.ரா-வின் எழுத்து காலம், இடம் ஆகிய வற்றை மட்டுமல்லாமல், புலன்களை மீறிய அனுபவங் களையும் சாத்தியப்படுத்துபவை. அதனாலேயே அவர் தரும் மந்திரத் தருணங்கள் நித்தியத்தன்மை பெற்றிருக்கின்றன.

அபூர்வ ராகம் கதையை இப்படித் தொடங்குகிறார்: ‘வீணையின் ஸ்வரக் கட்டுகளை விருதாவாய் நெருடிக் கொண்டிருக்கையில், திடீரென்று ஒரு வேளையின் பொருத்தத்தால் ஸ்வரஜாதிகள் புதுவிதமாய்க் கூடி ஒரு அபூர்வ ராகம் ஜனிப்பதுபோல் அவள் என் வாழ்க்கையில் முன்னும் பின்னுமில்லாது முளைத்தாள்.’ லா.ச.ரா-வும் இந்தப் பெண்ணைப் போலத்தான். இலக்கிய உலகில் முன்னும் பின்னும் யாருமற்ற அபூர்வ ராகம்.

உலகில் முதன்முறையாக ஜன்னல் இல்லாத விமானம்: பயணிகள் வான்வெளியை ரசிக்க முடியும்

விமானத்தில் பயணம் செய்கிறவர்கள் இனி ஜன்னல் ஓர இருக் கையை கேட்டுப் பெற வேண்டிய அவசியம் இருக்காது. உலகிலேயே முதன்முறையாக ஜன்னல் இல்லாத, அதேநேரம் பயணிகள் வான்வெளியைப் பார்த்து ரசிக்கும் வகையில் வடி வமைக்கப்பட்ட விமானம் பயன் பாட்டுக்கு வர உள்ளது.

பிரிட்டனைச் சேர்ந்த புத்தாக்க செயல்முறை மையம் (சிபிஐ) என்ற நிறுவனம், விமானத்தின் ஜன்னல்களுக்கு பதிலாக எடை குறைவான ஸ்மார்ட்ஸ்கிரீனை பொருத்த திட்டமிட்டுள்ளது. இதன் மூலம் எரிபொருள் செலவு மிச்சமா வதால், விமானக் கட்டணமும் குறையும் என எதிர் பார்க்கப்ப டுகிறது.

இந்த ஸ்கிரீனுக்கு வெளிப்புறத் தில் கேமராக்கள் பொருத்தப்படும். இத்துடன் ஆர்கானிக் ஒளி உமிழும் டயோடு (ஓஎல்இடி) தொழில் நுட்பத்தின் மூலம் இந்த விமானத் தில் பயணம் செய்யும் பயணிகள், இன்டர்நெட்டில் உலவிக் கொண்டே வான்வெளி யில் என்ன நடக்கிறது என்பதை ஸ்கிரீனில் பார்த்து ரசிக்க முடியும்.

மேலும் இந்த ஸ்மார்ட்ஸ்கிரீன் ஆன், ஆப் வசதி கொண்டதாக இருக்கும். இதன்மூலம் விரும்பும் போது வான்வெளியைப் பார்க்கவும், விரும்பாதபோது மூடிவிடவும் முடியும். இந்த விமானம் விரைவில் பரிசோதனை செய்யப்பட உள்ளது. எனினும் வர்த்தக ரீதியாக செயல் பாட்டுக்கு வர இன்னும் 10 ஆண்டுகள் ஆக லாம் என எதிர்பார்க்கப்படுகிறது.

செல்போன்கள், தொலைக் காட்சிகள் ஆகியவற்றில் பயன்ப டுத்தப்படும் தொழில் நுட்பத்தின் அடிப்படையில் இந்த ஜன்னல் இல்லாத ஸ்மார்ட்ஸ்கிரீனை சிபிஐ நிறுவன விஞ்ஞானிகள் உருவாக்கி வருகிறார்கள்.

சிபிஐ நிறுவன விஞ்ஞானிகள் மற்றும் பொறியாளர்கள் இந்த தொழில்நுட்பத்தை ‘வெளிப் புறத்தைப் பார்க்கும் வசதியுடன் கூடிய ஜன்னல்கள் இல்லாத கேபின்’ என கூறுகிறார்கள். ஜன்னலுக்கு பதில் ஸ்மார்ட்ஸ்கிரீன் பொருத்தப்பட்ட மாதிரி விமானம்

கருப்பு பணம் பதுக்கியவர்கள் முழு பட்டியல்: உச்ச நீதிமன்றத்தில் மத்திய அரசு தாக்கல்

வெளிநாடுகளில் கருப்பு பணத்தை பதுக்கியுள்ளவர்களின் முழு பட்டியலை உச்ச நீதிமன்றத்தில் மத்திய அரசு தாக்கல் செய்தது. இந்தப் பட்டியலில் 627 பேர் இடம் பெற்றுள்ளனர்.

இந்தப் பட்டியலை மத்திய அரசின் தலைமை வழக்கறிஞர் முகுல் ரோஹத்கி தாக்கல் செய்தார்.

கருப்பு பணம் பதுக்கிய 627 பேர் விவரங்கள் கொண்ட பட்டியல், சீலிடப்பட்ட உறையில் வைத்து தாக்கல் செய்யப்பட்டது. அந்த உறையை பிரிக்க உச்ச நீதிமன்றம் மறுத்துவிட்டது. மத்திய அரசு தாக்கல் செய்த பட்டியல், வெளிநாடுகளில் இந்தியர்கள் பதுக்கி வைத்துள்ள கருப்பு பணத்தை மீட்பது குறித்து விசாரணை நடத்தி வரும் சிறப்பு புலனாய்வுக் குழு முன்னர் சமர்ப்பிக்கப்படும் என உச்ச நீதிமன்றம் தெரிவித்துள்ளது. மேலும், சிறப்பு புலனாய்வுக் குழு தலைவரோ அல்லது துணை தலைவரோ மட்டுமே அந்த பட்டியல் அடங்கிய உறையை பிரிக்க முடியும் எனவும் தெரிவித்துள்ளது.

கருப்பு பணம் விசாரணை நிலவரம் குறித்த அறிக்கையை நவம்பர் இறுதிக்குள் தாக்கல் செய்யுமாறு சிறப்பு புலனாய்வு குழுவுக்கு உச்ச நீதிமன்றம் உத்தரவிட்டுள்ளது. கருப்பு பண விவகாரத்தில் அடுத்த கட்ட நடவடிக்கை என்ன என்பதையும் மத்திய அரசே தீர்மானிக்கும் என உச்ச நீதிமன்றம் தெரிவித்துள்ளது.

முன்னதாக செவ்வாய்க்கிழமை இந்த வழக்கு விசாரணைக்கு வந்தபோது உச்ச நீதிமன்ற தலைமை நீதிபதி எச்.எல். தத்து தலைமையிலான அமர்வு வெளிநாடுகளில் கருப்பு பணத்தை பதுக்கியுள்ளவர்களின் முழு பட்டியலை இன்று தாக்கல் செய்யுமாறு மத்திய அரசுக்கு உத்தரவிட்டது.

இது குறித்து மத்திய நிதியமைச்சர் அருண் ஜேட்லி கூறும்போது, “வெளிநாட்டில் கருப்புப் பணம் வைத்திருக்கும் அனைவரது விபரங்களும் உச்ச நீதிமன்றத்தில் தாக்கல் செய்யப்படும். கடந்த ஜூன் 27-ஆம் தேதி, சிறப்பு விசாரணைக் குழுவினரிடம் கருப்புப் பண நபர்கள் பட்டியல் தாக்கல் செய்யப்பட்டுள்ளது. அதன் விவரங்களை உச்ச நீதிமன்றத்திடம் பகிரப்படும்” என்றார்.

இந்நிலையில், வெளிநாடுகளில் கருப்பு பணத்தை பதுக்கியுள்ளவர்களின் முழு பட்டியல் உச்ச நீதிமன்றத்தில் தாக்கல் செய்யப்பட்டுள்ளது.

வழக்கு விவரம்:

வெளிநாடுகளில் இந்தியர்கள் பதுக்கி வைத்துள்ள கருப்பு பணத்தை மீட்பது குறித்த வழக்கு உச்ச நீதிமன்றத்தில் நடைபெற்று வருகிறது. உச்ச நீதிமன்ற உத்தரவின்பேரில் நீதிபதிகள் எம்.பி.ஷா, அரிஜித் பசாயத் தலைமையில் அமைக்கப்பட்ட சிறப்பு புலனாய்வுக் குழுவும் விசாரணை நடத்தி வருகிறது.

இந்நிலையில் மத்திய அரசின் தீவிர முயற்சியின்பேரில் வெளிநாடுகளில் கருப்புப் பணத்தை பதுக்கி வைத்துள்ளோரின் பட்டியல் பெறப்பட்டுள்ளது.

இதில் டாபர் இந்தியா நிறுவனத்தின் முன்னாள் இயக்குநர் பிரதீப் பர்மன், ராஜ்கோட்டைச் சேர்ந்த ஸ்ரீஜி டிரேடிங் கம்பெனி தலைமை மேம்பாட்டாளர் பங்கஜ் சிமன்லால் லோதியா, கோவாவைச் சேர்ந்த சுரங்க தொழிலதிபர் ராதா சதீஷ் திம்ப்லோ மற்றும் ஐந்து இயக்குநர்களின் பெயர்களை மத்திய அரசு உச்ச நீதிமன்றத்தில் நேற்று முன்தினம் தாக்கல் செய்தது.

இந்த வழக்கு தலைமை நீதிபதி எச்.எல்.தத்து, ரஞ்சனா பி.தேசாய், மதன் லோக்கூர் அடங்கிய அமர்வு முன்பு நேற்று விசாரணைக்கு வந்தது. அப்போது வெளிநாடுகளில் பணம் பதுக்கியுள்ள இந்தியர்களின் முழு பட்டியலையும் தாக்கல் செய்யாத மத்திய அரசுக்கு நீதிபதிகள் கடும் கண்டனம் தெரிவித்தனர்.

அனைத்து பெயர்களையும் வெளி யிட வேண்டும் என்று ஏற்கெனவே பிறப்பிக்கப்பட்ட உத்தரவை மாற்றக் கோரி மனு தாக்கல் செய்துள்ளதற்கும் கண்டனம் தெரிவித்தனர்.

‘குடை பிடிக்க வேண்டாம்’

‘கருப்பு பணம் பதுக்கியுள்ள வர்களை பாதுகாக்க மத்திய அரசு குடை பிடிக்க வேண்டாம்’ என்று தெரிவித்த நீதிபதிகள், ‘நீங்கள் வேறு எதுவும் செய்ய வேண்டாம். முழு பட்டியலையும் தாக்கல் செய்யுங்கள். சிறப்பு புலனாய்வுக் குழு அடுத்த கட்ட நடவடிக்கை எடுக்க நாங்கள் உத்தரவிடுகிறோம்’ என்று தெரிவித்தனர்.

மேலும், ‘இப்பிரச்சினையை மத்திய அரசின் பொறுப்பில் விடமுடியாது. அப்படி செய்தால், கருப்பு பணத்தை மீட்கும் கனவு நம் காலத்தில் நடக்காது. ஏற்கெனவே பிறப்பித்த உத்தரவில் ஒரு வார்த்தையைக்கூட மாற்றமாட்டோம். கருப்பு பணம் பதுக்கியுள்ளவர்களின் முழு பட்டியலையும் நீதிமன்றத்தில் மத்திய அரசு புதன்கிழமைக்குள் (இன்று) தாக்கல் செய்ய வேண்டும்’ என்றும் நீதிபதிகள் உத்தரவிட்டனர்.

பிகாசோ 10

ஓவியர், சிற்பி, கவிஞர், நாடக ஆசிரியர் என்று பன்முகத் திறமை கொண்ட பாப்லோ பிகாசோவின்

 பற்றிய அரிய முத்துக்கள் பத்து…

• பிறந்தது ஸ்பெயினில். வாழ்நாளில் பெரும் பகுதியைக் கழித்தது பிரான்ஸில். இவரது ஓவியக் கலை ஈடுபாடு குழந்தைப் பருவத்திலேயே வெளிப்பட்டது. இவர் முதலில் உச்சரித்த வார்த்தை ‘பென்சில்’ என்பதுதானாம். இதை அவரது தாய் பூரிப்போடு சொல்வார். ஓவியப் பள்ளி ஆசிரியரான தந்தையிடம் 7 வயதில் ஓவியப் பயிற்சியைத் தொடங்கினார். 13 வயதிலேயே தந்தையை விஞ்சிய தனயன் ஆனார்.

• பள்ளிப் பருவத்தில், பாடம் என்றாலே இவருக்கு கசப்பு. மோசமான மாணவனாக கருதப்பட்டார். ஒருமுறை சேட்டை அதிகமாகி, தனி அறையில் அடைத்தார்கள். உற்சாகமானவர் நோட்டுப் புத்தகத்தில் வரைய ஆரம்பித்துவிட்டார். ‘‘அந்த தனிமை ரொம்ப பிடித்திருந்தது. நிரந்தரமாக அடைத்து வைத்திருந்தால்கூட மகிழ்ச்சியாக இருந்திருப்பேன்’’ என்று பின்னாளில் கூறியிருக்கிறார்.

• பார்சிலோனா நுண்கலைக் கல்லூரி நுழைவுத் தேர்வில் அதிக மதிப்பெண் பெற்றதால் 14 வயது சிறுவன் பிகாசோவுக்கு விதிவிலக்கு அளித்து சேர்த்துக்கொண்டனர். ஆனால், கல்லூரியின் கட்டுப்பாடுகள் பிடிக்காமல் வகுப்புகளை ‘கட்’ அடித்துவிட்டு வீதிகளில் சுற்றித் திரிவார். கண்ணில்பட்ட காட்சிகளை மனதில் பதியவைத்து ஓவியங்களாகத் தீட்டுவார். மாட்ரிட் நகரில் உள்ள சான் பெர்னாண்டோ ராயல் அகாடமியில் ஓவியக் கலை பயின்றபோதும் இதேபோலத்தான்.

• பாரம்பரிய ஓவிய பாணியில் இருந்து 18 வயதில் முழுவதுமாக விடுவித்துக்கொண்டு புதிய முயற்சிகளில் இறங்கினார்.

• ‘யங் லேடீஸ் ஆஃப் அவென்யூ’ என்ற ஓவியம் மூலம் கியூபிசம் எனப்படும் புதிய பாணியை அறிமுகப்படுத்தினார். 5 பாலியல் தொழிலாளர்களை சித்தரிக்கும் இந்த ஓவியம், வெவ்வேறு கோணங்களில் பார்க்கும்போது மாறுபட்ட விஷயங்களை உணர்த்தும். இந்த ஓவியம் பெரும் சர்ச்சையை ஏற்படுத்தினாலும், கலை உலகில் புதிய புரட்சியை உருவாக்கியது.

• சிற்பம் வடிப்பது, செராமிக் ஓவியம் தீட்டுவதிலும் தனித்தன்மையுடன் பிரகாசித்தார்.

• அமைதியின் அடையாளச் சின்னமாக ஆலிவ் இலைகள், புறாவை பிரபலப்படுத்தியவர் இவர்தான்.

• ஸ்பெயினின் கெர்னிகா கிராமத்தை ஹிட்லரின் நாஜிப் படை குண்டு வீசி நாசமாக்கியதைக் கண்டித்து ‘கெர்னிகா’ என்ற ஓவியத்தை தீட்டினார். அது இவரது போர் எதிர்ப்பு மனோபாவத்தை வெளிப்படுத்தியது.

• இவரது வாழ்க்கையை மையமாக வைத்து தயாரிக்கப்பட்ட சில திரைப்படங்களில் ‘தி மிஸ்ட்ரி ஆஃப் பிகாசோ’ திரைப்படம் குறிப்பிடத்தக்கது. இது 1955-ல் வெளியானது.

• 2 ஆயிரம் சிற்பங்கள், 1200-க்கும் மேற்பட்ட ஓவியங்கள், 3 ஆயிரம் மண்பாண்ட சிற்பங்கள் உட்பட பல்லாயிரக்கணக்கான கலைப் படைப்புகளுக்கு உயிர்கொடுத்த பிகாசோ, 93-வது வயதில் இறந்தார்.

வில்லியம்ஹென்றி கேட்ஸ் (பில் கேட்ஸ்) 10

கணினி ஜாம்பவான் பில்கேட்ஸின் பிறந்த நாள் இன்று. அவரைப் பற்றிய அரிய முத்துக்கள் பத்து...

• வாஷிங்டனில் பிறந்தவர். அம்மா செல்லம். சிறு வயதிலேயே வாசிப்புப் பழக்கம் தொற்றிக் கொண்டது. பள்ளியில் கணிதம் மற்றும் அறிவியல் பாடங்களில் ஆச்சர்யமூட்டும் வகையில் அசத்தினார்.

• கணினி நிறுவனம் ஒன்று மாணவர்களுக்குக் கணினிப் பாடம் சொல்லித்தர முன்வந்தது. கணினியைப் பார்த்தவுடனே காந்தம்போலக் கவரப்பட்டார் பில்கேட்ஸ். குறுகிய நாட்களிலேயே அடிப்படை கணினி லாங்குவேஜில் டிக்-டாக்-டோ என்கிற தனது முதல் கணினி நிரலை வடிவமைத்தார்.

• பால் ஆலனைச் சந்தித்தது கேட்ஸுக்கு மட்டுமல்ல... கணினி உலகத்துக்கே திருப்புமுனை. 1970-ல் இருவரும் இணைந்து நகரின் போக்குவரத்தைக் கண்காணிக்கும் கணினி தொழில்நுட்பத்தை உருவாக்கினார்கள். கேட்ஸுக்கு அப்போது வயது 15. இருவரும் இணைந்து நிறுவனம் தொடங்க ஆசைப்பட்டனர். ஆனால், கேட்ஸின் பெற்றோர் ஆசையோ வேறாக இருந்தது. வலுக்கட்டாயமாக வழக்கறிஞர் தொழிலுக்குப் படிக்க அனுப்பிவிட்டார்கள்.

• கணினியை மறக்க முடியாதவர் கல்லூரிப் படிப்பை பாதியில் உதறினார். ஆலன் வேலை பார்த்த நிறுவனத்தில் சேர்ந்தார். அங்கு ‘ஆல்டர் 8800’ தொழில்நுட்பம் பற்றி கேட்ஸ் அறிந்தார். இதை நியு மெக்சிகோ நகரில் உள்ள மைக்ரோ இன்ஸ்ட்ருமன்டேஷன் அன்ட் டெலிமெட்ரி சிஸ்டம் (எம்.ஐ.டி.எஸ்) என்ற சிறுநிறுவனம் உருவாக்கியிருந்தது.

• 1975-ல் இருவரும் இணைந்து ‘மைக்ரோ சாஃப்ட்’ நிறுவனத்தைத் தொடங்கினர். 1978-ம் ஆண்டு அந்த நிறுவனம் இரண்டரை மில்லியன் டாலர் வருவாய் ஈட்டியது. அப்போது கேட்ஸுக்கு வயது 23.

• மென்பொருள் வடிவமைப்பில் மட்டுமல்லாமல் வியாபார உத்திகளிலும் புரட்சியைப் புகுத்தினார் கேட்ஸ். 1980-ல் ஐ.பி.எம்-உடன் தொழில் ஒப்பந்தம் செய்துகொண்டனர்.

• 1983-ல் பிரிட்டனிலும், ஜப்பானிலும் மைக்ரோசாஃப்ட் கிளை பரப்பியது. போட்டி நிறுவனங்களாக இருந்தாலும், ஆப்பிளும் மைக்ரோசாஃப்டும் கண்டுபிடிப்புகளைப் பகிர்ந்து கொண்டன. உங்கள் கைகளில் தவழும் வின்டோஸ் பிறந்தது இப்படிதான்.

• கேட்ஸ் நூலாசிரியரும்கூட. தனது சகாக்களுடன் இணைந்து இரண்டு நூல்களை எழுதினார். தனி நபர் கணினிப் பயன்பாட்டுப் புரட்சி மற்றும் அதிவேகத் தகவல் தொடர்பின் வரவு உலகை எவ்வாறு மாற்றப்போகிறது என்பதைப் பற்றி அவர் அதில் எழுதினார்.

• தன் நிறுவனத்தின் பணிபுரிந்த மெலின்டாவை திருமணம் புரிந்தார். மெலின்டாவின் மனிதநேயம் இவரையும் பற்றிக் கொண்டது. ‘வில்லியம் ஹெச். கேட்ஸ் ஃபவுண்டேஷன்’ மற்றும் ‘பில் அன்ட் மெலின்டா கேட்ஸ் ஃபவுண்டேஷன்’ தொடங்கப்பட்டன. உலகம் முழுவதும் நலிவுற்றோருக்கு கல்வியும் மருத்துவமும் அளிக்கின்றன அந்த அமைப்புகள்.

• 20-ம் நூற்றாண்டின் செல்வாக்கு மிகுந்த நபர் என்றது டைம் பத்திரிகை. உலகம் முழுவதும் உள்ள பல்வேறு பல்கலைக்கழகங்கள் கேட்ஸுக்கு கவுரவ 

யு.பி.எஸ்.சி., நடத்தவுள்ள சிறப்புப் பிரிவு பயிற்சியாளர் பணியிடத் தேர்வு

யூனியன் பப்ளிக் சர்வீஸ் கமிஷன் எனப்படும் யு.பி.எஸ்.சி., அமைப்பு மத்திய அரசு தொடர்பான அமைச்சகப் பணியிடங்கள் மற்றும் சிறப்புத் தேர்வுகளை நடத்தி அதன் மூலம் காலியிடங்களை நிரப்பி வருவது நாம் அறிந்ததுதான். இந்த அமைப்பின் சார்பாக ஸ்பெஷல் கிளாஸ் ரயில்வே அப்ரென்டிஸஸ் எக்ஸாம் - 2015ஐ நடத்துவதற்கான அறிவிப்பு வெளியிடப்பட்டுள்ளது.
வயது: 01.01.2015 அடிப்படையில் 17 வயது முதல் 21 வயது நிரம்பியவராக இருக்க வேண்டும். அதாவது 02.01.1994க்கு பின்னரும் 01.01.1998க்கு முன்னரும் பிறந்தவராக இருக்க வேண்டும்.
கல்வித் தகுதி: 10ம் வகுப்புக்கு நிகரான படிப்பில் முதல் அல்லது இரண்டாம் வகுப்பில் தேர்ச்சியானவர்கள், பிளஸ்2 விற்கு நிகரான படிப்பில் கணிதம், இயற்பியல் மற்றும் வேதியியல் பாடங்களுடன் முடித்தவர்கள், இதே பாடங்களுடன் பட்டப் படிப்பை முடித்தவர்கள் மற்றும் இதற்கு இணையான தகுதிகளை மாலைக் கல்லூரிகளிலோ, நேஷனல் கவுன்சில் பார் ரூரல் ஹையர் எஜூகேஷன் போன்றவற்றில் முடித்தவர்களும் விண்ணப்பிக்கலாம். முழுமையான தகவலை இணையதளத்தைப் பார்த்து அறியவும்.
விண்ணப்பக் கட்டணம்: பாரத ஸ்டேட் வங்கியில் ரூ.100/- ஐ செலுத்த வேண்டும். கிரெடிட் மற்றும் டெபிட் கார்டு, நெட் பேங்கிங் வாயிலாகவும் இதனை செலுத்த முடியும்.
தேர்ச்சி முறை: பொது எழுத்துத் தேர்வு வாயிலாக தேர்ச்சி இருக்கும். எழுத்துத் தேர்வை தமிழ் நாட்டில் சென்னை, மதுரையிலும், அருகிலுள்ள மாநில மையங்களான பெங்களூரு, திருவனந்தபுரம், கொச்சி மற்றும் திருப்பதியிலும் எதிர்கொள்ளலாம்.
விண்ணப்பிக்கும் முறை: ஆன்-லைன் முறையில் விண்ணப்பிக்க வேண்டும்.
விண்ணப்பிக்க இறுதி நாள்: 07.11.2014
இணையதள முகவரி: www.upsc.gov.in/exams/notifications/2015/Notice%20SCRA%202015%20ENGLISH.pdf

நெப்போலியன் ஹில் 10

வெற்றி சூத்திரங்களின் நாயகன் நெப்போலியன் ஹில்லின் பிறந்தநாள் இன்று. அவரைப் பற்றிய அரிய முத்துக்கள் பத்து...

* அமெரிக்காவின் தென் மேற்கு வர்ஜீனியாவில் பிறந்தவர். சிறு வயதிலேயே தாய் இறந்து விட்டார். யாருக்கும் அடங்காமல் சுற்றித் திரிந்த சிறுவனை, தந்தையின் 2-வது மனைவிதான் நல்வழிப்படுத்தினார்.

* 15 வயதில் உள்ளூர் பத்திரிகையில் நிருபரானார். அங்கு பணி யாற்றிக்கொண்டே சட்டக் கல்லூரியில் சேர்ந்தார். வருமானம் போதாமல் சட்டக் கல்வியை பாதியிலேயே நிறுத்திவிட்டார்.

* 1908-ல் பிரபல சாதனையாளர்களை பேட்டி கண்டு எழுதினார். பிட்ஸ்பர்க் நகரத்தின் பிரபல எஃகு நிறுவன அதிபர் ஆண்ட்ரூ கார்னகியை பேட்டி கண்டது இவரது வாழ்க்கையின் திருப்புமுனையாக அமைந்தது.

* ஹில்லிடம் ஒரு சவால் விடுத்தார் கார்னகி. ‘‘எந்த சமரசமும் செய்துகொள்ளாமல் 20 ஆண்டுகள் தொடர்ந்து வெற்றிக்கான கோட்பாடுகளை ஆவணப்படுத்தி பதிவு செய்ய வேண்டும்’’ என்பதுதான் அது. இதன்மூலம் நிறைய சாதனையாளர்களை ஹில்லிடம் அறிமுகப்படுத்தினார் கார்னகி.

* 20 ஆண்டு காலத்தில் ஏராளமான வாய்ப்புகள் குவிந்தன. தியோடர் ரூஸ்வெல்ட், தாமஸ் எடிசன், ஜான் டி. ராக்ஃபெல்லர், ஹென்றி ஃபோர்டு, அலெக்சாண்டர் கிரஹாம் பெல் உள்ளிட்டவர்களை சந்தித்து வெற்றிக் கோட்பாடுகளைத் திரட்டினார்.

l‘‘இலக்கில் உறுதியோடு இருப்பது, தனக்கு என்ன தேவை என்பதை மிகச் சரியாக தெரிந்து வைத்திருப்பது.. இந்த இரண்டும் இருந்தால் வெற்றி பெறுவது சிரமமாக இருக்காது’’ என்ற கார்னகியின் கோட்பாடுகள்தான் ஹில்லின் சுய முன்னேற்றப் படைப்புகளுக்கு அடித்தளம்.

* வெற்றிக் கோட்பாடுகளுக்காக ஹில் தொடங்கிய பத்திரிகை பெரும் வெற்றி பெற்றது. கடந்த 50 ஆண்டு காலத்தில் மாபெரும் சாதனையாளர்களின் வெற்றி சூத்திரங்கள் அடங்கிய ‘தி லா ஆஃப் சக்சஸ்’ என்ற புத்தகத்தை 1928-ல் வெளியிட்டார். இந்த புத்தகம் விற்பனையில் சாதனை படைத்தது. இவரது இன்னொரு படைப்பு ‘திங்க் அண்ட் குரோ ரிச்’ 1930-ல் வெளியானது. கோடிக்கணக்கான பிரதிகள் விற்றுள்ளது.

* உட்ரோ வில்சன், பிராங்க்ளின் ரூஸ்வெல்ட் ஆகிய இரு அமெரிக்க அதிபர்களுக்கு ஆலோசகராக இருந்திருக்கிறார்.

lதனி நபர் சாதனைக்கான இவரது தத்துவம் ஆழமானது, விசாலமானது. ஒருவருக்குள் புதைந்துக்கிடக்கும் ஆற்றலை அவரே கண்டறிய உதவுவதுதான் இவரது படைப்புகள் என்கிறார்கள்.

* இவரது வெற்றித் தத்துவங்கள் உலகம் முழுவதும் பல கோடி பேரை வெற்றியாளர்களாக, செல்வந்தர்களாக மாற்றி வருகின்றன. ‘வெற்றி அறிவியலின் தந்தை’ என்று போற்றப்படும் நெப்போலியன் ஹில் 87-ம் வயதில் காலமானார்.

வ.ரா-வும் மீட்கப்பட்ட கடிதங்களும்

வசிஷ்டர் வாயால் பிரம்மரிஷி பட்டம் வாங்க எத்தனை பேரால் முடிந்தது என்பது தெரியவில்லை. ஆனால், அறிஞர் அண்ணாவிடமிருந்து ‘அக்ரஹாரத்து அதிசய மனிதர்’ என்ற பட்டத்தை வாங்கியவர் வ. ராமசாமி ஐயங்கார் என்கிற வ.ரா.

விடுதலைப் போராட்ட வீரர், அலிப்பூர் சிறையில் துன்பத்தை அனுபவித்தவர், பெண் விடுதலை, விதவை மறுமணம், தாழ்த்தப்பட்டவர் நலனுக்காக ஓயாது எழுதியும் போராடியும் வந்தவர். மணிக்கொடியின் ஆசிரியர் என்ற முறையில், நவீன தமிழ் இலக்கிய மறுமலர்ச்சி என எல்லாத் துறைகளிலும் தடம் பதித்த வ.ரா-வுக்கு அவருடைய சமகாலத்தவர்கள் எழுதிய கடிதங்கள் தற்போது தொகுக் கப்பட்டு நூலாக வரவிருக்கின்றன. சென்னைப் பல்கலைக் கழகத்தின் தமிழ்த் துறைத் தலைவராகப் பணியாற்றி ஓய்வுபெற்ற பேராசிரியர் வீ. அரசு இந்தப் பணியை மேற்கொண்டிருக்கிறார்.

“நூற்றோடு நூற்றி ஒன்றாவது நூலாக நான் இதை வெளியிட விரும்பவில்லை. வடிவமைப்பில் பெரிய புத்தக மாக, எல்லாக் கடிதங்களுக்கும் தனியாக ஒரு விளக்கம் எழுதி, வ.ரா. என்ற ஆளுமையை வெளிப்படுத்துவதே என்னுடைய நோக்கம்” என்கிறார் அரசு.

குப்பையில் கிடந்த வரலாறு

இக்கடிதங்களை அவர் கண்டெடுத்த கதையைக் கேட்கும்போது மனம் வேதனையடைகிறது. “வ.ரா-வின் மனைவி இறந்ததை அறிந்து நுங்கம்பாக்கத்தில் உள்ள அவருடைய இல்லத்துக்குச் சென்றிருந்தேன். அங்கே ஒரு மூலையில் குப்பையாகக் குவிக்கப்பட்டு, சில காகிதங்கள் கிடந்தன. அவற்றைக் கூர்ந்து நோக்கியதில், முதலில் தென்பட்டது, பாரதிதாசன் வ.ரா-வுக்கு எழுதிய கடிதம்” என்று விளக்கினார் அரசு.

வைணவ ஆசாரியரும் சீர்திருத்தவாதியுமான இராமானுஜர் குறித்து வ.ரா. திரைப்படம் இயக்கினார். அந்தப் படத்துக்குப் பாடல் எழுதுவதற்கு பாரதிதாசனை ஏற் பாடு செய்திருந்தார். செய்யப்பட்ட ஏற்பாடுகள் சரியில்லை என்று கடுமையாகத் திட்டி எழுதியிருந்தார் அக்கடிதத்தில்.

“இருப்பினும் நீ என் நண்பன் என்பதால், எல்லாவற்றையும் பொறுத்துக்கொள்கிறேன்” என்று பாரதிதாசன் கடிதத்தை முடித்திருந்தாராம்.

வ.ரா. மணிக்கொடியின் ஆசிரியராக இருந்த கால கட்டத்தில், அதில் அதிகக் கவிதைகளை எழுதியவர் புதுக் கவிதை மரபுக்கு வழிகாட்டிய ந.பிச்சமூர்த்தி. அவருக்கு, அடுத்தபடியாக அதிகக் கவிதைகளை பாரதிதாசன்தான் மணிக்கொடியில் எழுதியிருக்கிறார். அத்துடன் புதுமைப் பித்தனின் பெரும்பாலான கதைகள் வ.ரா. காலத்தில்தான் மணிக்கொடியில் வெளியாகியிருக்கின்றன.

வ.ரா. என்ற முன்னோடி

‘பாரதியார் மகாகவியா?’ என்றும் ‘அவருடைய கவிதைகள் மகா கவிதைகளா?’ என்றும் கல்கி கிருஷ்ண மூர்த்தி போன்றோர் கேள்வி எழுப்பியபோது, மணிக் கொடியில் தொடர்ந்து எழுதி, பாரதி மகா கவிதான் என்று நிலைநிறுத்தியவர் வ.ரா.

“நவீன தமிழ் இலக்கியத்துக்குப் பங்களித்தவர்கள் எல்லோருமே வ.ரா-வின் எழுத்தின் தாக்கத்துக்கு உள்ளான வர்களே. அந்த அளவுக்கு அவருக்கு ஒரு சிறந்த எழுத்து நடை இருந்தது” என்கிறார் அரசு.

அவர் எழுதிய கோதைத்தீவு நாவல், பெண்களால் மட்டுமே ஆளப்படும் கற்பனை உலகம். வ.ரா. வாழ்ந்த காலத்தில் இப்படி ஒரு கருத்தை எண்ணிப் பார்த்திருக்க முடியுமா என்பது ஐயமே.

இருப்பினும் ஒரு கட்டத்தில் அவர், தன்னுடைய சொந்த ஊரான திருப்பழனத்துக்குச் சென்று தங்கிவிட்டார். திருவையாருக்கு அருகில் உள்ள இந்த ஊர் தேவாரத்தால் பாடப்பட்ட ஊர். ‘அன்னம் வைகும் வயல் பழனத்தனை’ என்கிறார் நாவுக்கரசர். அவர் சென்னையை விட்டுச் சென்றுவிட்டதைக் கேள்விப்பட்ட வ.உ.சி. தூத்துக்குடி யிலிருந்து மிகுந்த கோபத்துடன் ஒரு கடிதம் எழுதினார்:

“தாங்கள் தேசத்துக்குச் சேவை செய்து முடிந்துவிட்ட தென்று கருதித் திருப்பழனத்தில் போய்த் தூங்கத் தொடங்கிவிட்டீர்களா? அல்லது தாங்கள் பெரும் பொருள் மீதப்படுத்திவிட்டமையால் இன்பம் துய்க்கத் தொடங்கிவிட்டீர்களா? இரண்டில் எது நினைத்தாலும் தவறு. தேசம் அடிமைப்பட்டேயிருக்கிறது. என் போன்ற உண்மை தேசாபிமானிகள் பலர் வறுமையில் ஆழ்ந்திருக்கிறோம்” என்று தன்னுடைய கடிதத்தில் வ.உ.சி. தெரிவிக்கிறார்.

“தேசத்துக்குச் சேவை செய்ய வெளிக் கிளம்புக” என்று கூறும் வ.உ.சி., இலங்கையிலிருந்து வெளியாகும் வீரகேசரி பத்திரிகையின் தலைமையாசிரியர் பொறுப்பை ஏற்குமாறு வ.ரா-வைக் கேட்டுக்கொள்கிறார். அதை ஏற்றுக் கொண்டுதான் வ.ரா-வும் இலங்கை சென்றார்.

குப்பையிலிருந்து தப்பிப் பிழைத்த கடிதங்கள் வரலாற் றின் மீது வெளிச்சம் பாய்ச்சுகின்றன. இந்த அதிர்ஷ்டம் வாய்க்கப் பெறாத எழுத்தாளர்கள் தமிழில் ஏராளம் என்பது தான் நமது அவலம்.

- ப. கோலப்பன், தொடர்புக்கு: kolappan.b@thehindu.co.in